Qytaıda magnıtýdasy 4,3 taǵy bir jer silkinisi tirkeldi

BEIJІŃ. QazAqparat - Sychýan provıntsııasynyń ońtústik-batysynda magnıtýdasy 4,3 taǵy bir jer silkinisi tirkeldi, dep habarlaıdy QazAqparat TASS agentigine silteme jasap.

Qytaı seısmologııalyq ortalyǵynyń málimetinshe, zilzala oshaǵy Veııýan ýeziniń Neıtszıan qalasynan 20 shaqyrym jerde bolǵan.

Jer silkinisi jergilikti ýaqytpen saǵat 10:36-da tirkelgen. Ol 7 km tereńdikte bastalǵan. Ol 16 mln turǵyny bar Chendý qalasynan 140 shaqyrym, 31 mln turǵyny bar Chýntsın qalasynan 200 km jerde boldy. Ázirge qıraǵan ǵımarattar men zardap shekken adamdar týraly málimet joq.

Sınhýa agenttiginiń habarlaýynsha, Veııýan ýezinde buǵan deıin bir joıqyn jer silkinisi bolǵan. Alǵashqy jer dúmpýiniń magnıtýdasy 5,4 boldy, ol tańǵy saǵat 06:42-de tirkeldi.

Sońǵy málimetterge sáıkes zilzaladan bir adam qaza taýyp, 29 adam jaraqat aldy.