Qytaıda quıynnan 12 adam qaza taýyp, 400-den astamy zardap shekti

BEIJІŃ. QazAqparat - Qytaıdyń Ýhan jáne Sýchjoý qalalarynda joıqyn tornadodan 12 adam qaza taýyp, 400-den astam turǵyn jaraqat aldy, dep habarlaıdy QazAqparat Global Times basylymyna silteme jasap.

Qytaı gazeti taratqan málimetke sensek, Ortalyq Qytaıdyń Hýbeı provıntsııasynda ornalasqan Ýhan qalasynda tabıǵat apatynan 8 adam mert bolǵan, 280-i zardap shekti.

Senbi kúni tańerteń kúshti jel men quıynnan 480 turǵyn úı qırap, zaqymdanǵan. 8 myń sharshy metr aýmaqta qurylys alańyndaǵy ýaqytsha ǵımarattar opyrylyp qaldy.

Sol kúni Ýhannyń Tıanhe halyqaralyq áýejaıynda 87 reıs keshigip ushty, taǵy 123 reıs múlde keıinge qaldy.

Shyǵys Qytaıdaǵy Tszıansý provıntsııasynyń Sýchjoý qalasynda daýyldan 4 adam kóz jumdy. 149 turǵyn jaraqat aldy.

Úskirik jeldiń ekpini sekýndyna 23,9 metrge jetken.