Qytaıda qus tumaýyna shaldyqqandardyń sany artyp keledi
ASTANA. QazAqparat - Qytaıdyń ońtústigindegi Gýandýn provıntsııasynda jyl basynan beri H7N9 qus tumaýyna shaldyqqan adamdardyń sany 30-ǵa deıin ósti.
Jeksenbide jergilikti BAQ-tyń habarlaýynsha, Tszeıan qalasynda osyndaı dıagnoz qoıylǵan 48 jastaǵy patsıent qaıtys boldy, taǵy birneshe adam aýyr halde jatyr. Mamandardyń pikirinshe, bul aýrýdy juqtyrýdyń kóptegen oqıǵalaryna adamdardyń tiri qustarmen baılanysy sebep bolýda.
Gýandýn fermalarynda aýrýdyń oshaǵy tabylǵan aýdandarda taýyqtar men basqa da úı qustaryn jappaı joıý jumystary júrgizilýde. Barlyq bazarlarda qustardy tirileı satýǵa tyıym salynǵan.
Bılik kózderi 19 aqpanda atap ótiletin Chýntsze - aı kúntizbesi boıynsha jańa jyl merekesi jaqyndaǵan saıyn qaýipti derttiń jyldam taratylýynan qorqyp otyr. Qytaılyqtardyń úılerinde merekelik taǵamdar qatarynda taýyq etinen jasalǵan as mindetti túrde bolady, kóp adamdar taýyqtardy tiri kúıinde satyp alǵandy unatady.
QHR-da qus tumaýy alǵash ret 2013 jyldyń naýryz aıynda tirkelgen. Ótken jyly munda H7N9 indetine 120 adam shaldyqsa, sonyń 39-y kóz jumǵan.
