Qytaıda kún kúrt sýytyp, qaýiptiliktiń «kók» deńgeıi jarııalandy
BEIJІŃ. Sınhýa-QazAqparat – Búgin Qytaı ulttyq meteorologııalyq observatorııasy kúnniń kúrt sýytýyna baılanysty qaýiptiliktiń «kók» deńgeıin jarııalady, dep habarlaıdy QazAqparat «Sınhýa» agenttigine silteme jasap.
«Búgin túnnen bastap 26 qarashaǵa deıin ıAntszy ózeniniń orta jáne tómengi aǵysyndaǵy keıbir aýmaqtarynda, sondaı-aq Shyǵys Qytaıdyń jaǵalaý mańyndaǵy aýdandarda qatty jel soǵady», - delingen Qytaı ulttyq meteorologııalyq observatorııasynyń málimetinde.
Eldiń soltústik-batys, soltústik jáne soltústik-shyǵys bóligindegi birqatar aýdandarda aýa temperatýrasy 6-10 gradýsqa tómendeıdi. Atalǵan aýdandardyń keıbirinde - 12 gradýsqa deıin sýytady.
Osyǵan oraı meteorologııalyq ortalyq turǵyndardy abaı bolýǵa jáne syrtta kóp júrmeýge shaqyrdy.
Qytaıda qolaısyz aýa raıy týraly eskertýdiń tórt túrli deńgeıi qabyldanǵan. Qaýiptilik deńgeıiniń 4 túri bar, eń qaýipti deńgeıi - qyzyl tústi, odan keıin qyzǵylt sary, sary jáne kók tústi.
