Qytaıda kóshpendi qazaq mádenıeti týraly fılm túsirilmek
Qytaıdyń halyq gazeti saıtyndaǵy málimetke súıensek, túsirilim 13 mamyr kúni Shynjańnyń Morı Qazaq avtonomııaly aýdanynda resmı bastalǵan.
«Shopan rýhy» dep atalatyn bul fılmde Qumar jáne Qadısha esimdi malshy otbasynyń ómiri arqyly kóshpeli mádenıettiń qazirgi kórinisi, tańǵajaıyp dala tabıǵaty túsirilmek.
«Qoǵam ekonomıkasynyń, mádenıetiniń damýymen birge elimizdegi qazaq ultynyń da turmysy jaqsaryp, órkendep keledi. Búginde qatynas quraldarynyń damýyna baılanysty baıyrǵy kóshpeli ómirdiń beınesi ózgerdi. Sondyqtan biz fılmde qazaqtyń kóshpeli mádenıetiniń jarqyn beınesin jan-jaqty sýretteımiz. Fılm halyqaralyq deńgeıde nasıhattalyp, «Bir beldeý, bir jol» jobasy arqyly ejelgi Jibek joly boıyndaǵy elderge kórsetiletin bolady. Sol arqyly búkil álem Shynjańnyń ásem tabıǵatymen tanysa alady. Bunda bizdiń eń úzdik shyǵarmashylyq top jumys jasaıdy», - deıdi «Tıan-Shan» kıno stýdııasynyń basshysy Gaý Haýańgań.
