Qytaıda koronavırýstyń órshýine baılanysty aýrýhana-ızolıator salyna bastady

BEIJІŃ. QazAqparat – Bıylǵy jyl basynan beri Covid-19-dyń kúrt artýy tirkelgen Qytaıdyń Hebeı provıntsııasynda ızolıatordyń qurylysy bastaldy, dep habarlaıdy «QazAqparat» HAA menshikti tilshisi.

Osy aptada bastalǵan qurylys Shıtszıachjýan qalasynyń mańynda júrgizilýde. Bul qalada koronavırýstyń taralýy kúrt óskendikten lokdaýn engizildi. Oqshaýlaý aýrýhanasy 33 gektar aýmaqty almaq.

Joba merdigeriniń aıtýynsha, 3 myńǵa jýyq palata daıyndaý tapsyrylǵan. Ár palatanyń aýdany – 18 sharshy metr.

Eske salsaq, «Hoshenshan» mamandandyrylǵan alǵashqy aýrýhanasy Qytaıda koronavırýstyń taralý oshaǵyna aınalǵan Ýhanda (Hýbeı provıntsııasy) 10 kúnde salynǵan bolatyn. Jalpy aýmaǵy 25 myń sharshy metrdi quraıtyn aýrýhana bir mezette 1 myńǵa jýyq naýqasty qabyldaı aldy.

Shıtszıachjýandaǵy aýrýlardyń aldyn alý jáne baqylaý shtabynyń (Hebeı provıntsııasy) nusqamasyna sáıkes, Shıtszıachjýan men onyń tóńireginde turatyn jergilikti turǵyndarǵa 19 qańtarǵa deıin úıden shyqpaý mándetteldi.

Qytaıda ótken bir táýlikte koronavırýs ınfektsııasynyń 115 rastalǵan jergilikti jaǵdaıy tirkeldi, olardyń 90-y Hebeı provıntsııasynda, 23-i Heılýntszıan provıntsııasynda, 2-eýi Beıjińde.