Qytaıda koronavırýstan aıyqqan adamdar sany artyp keledi
Koronavırýstan aıyqqandar sanynyń az bolýy osy aýrýdy emdeýdiń uzaqtyǵyna baılanysty ekenin atap ótken jón. Aýrýdyń jeńil belgileri bar naýqastar bir apta ishinde ony jeńe alady. Al aýyr túrimen aýyratyn naýqastarǵa kem degende eki apta qajet bolýy múmkin.
Qytaıda jáne álemniń túrli zerthanalarynda ǵalymdar koronavırýstyń jańa túrine qarsy vaktsına jasaýmen aınalysa bastaǵanda, Qytaı bıligi osy aýrýdy dıagnostıkalaý jáne emdeý úshin tájirıbelik «ádisteme» ázirledi. Onda vırýs týraly jańa málimetterdi eskere otyryp aqparat únemi jańaryp otyrady.
Medıtsına ǵylymdarynyń kandıdaty, dástúrli qytaı medıtsınasynyń beıjińdik «Jensin» klınıkasynyń dırektory Chjan Tsıao QazAqparatqa bergen suhbatynda 2003 jyly Qytaı tuńǵysh ret dúnıejúzilik problemaǵa – atıpııalyq pnevmonııaǵa tap bolǵanda el tarıhyndaǵy barlyq dástúrli medıtsına úshin bul úlken betburys bolǵanyn aıtty.
«Qazirgi jaǵdaıda da jańa koronavırýspen tıimdi kúresý úshin aspan asty eli dástúrli qytaılyq medıtsınaǵa súıenedi», - dedi Chjan Tsıao.
Naýqastardy dıagnostıkalaý men emdeý protsesinen bólek, qytaılyq dárigerler patsıentterdi aıyǵyp shyqqannan keıin aýrýhanadan shyǵarý protsedýrasyna da óte muqııat qaraıdy.
Qytaı Halyq Respýblıkasynyń Gıgıena jáne densaýlyq saqtaý boıynsha memlekettik komıteti departamenti basshysynyń orynbasary Tszıao ıAhýıdiń aıtýynsha, aýrýhanadan emdelip shyqqanǵa deıin naýqasta aýrýdyń belgileri bolmaýy kerek, dene qyzýy qalypty bolýy tıis jáne vırýstyq nýkleın qyshqylynyń taldamasy eki ret teris nátıje kórsetýi kerek.