Qytaıda koronavırýsqa qarsy vaktsınanyń 40 mln dozasy egildi

BEIJІŃ. QazAqparat – Qytaıda 10 aqpanda koronavırýsqa qarsy vaktsınanyń 40,52 mıllıon dozasy egildi. Bul týraly QazAqparat QHR Densaýlyq saqtaý isteri jónindegi memlekettik komıtetiniń málimdemesine silteme jasap habarlaıdy.

«2021 jylǵy 9 aqpan, saǵat 24:00-degi jaǵdaı boıynsha elde jalpy alǵanda vaktsınanyń 40,52 mıllıon dozasy egildi» delingen vedomstvonyń málimdemesinde.

QHR Densaýlyq saqtaý isteri jónindegi memlekettik komıtetiniń resmı ókili Mı Fenniń aıtýynsha, Qytaıda úsh kún boıy qatarynan koronavırýsqa shaldyǵýdyń jańa oqıǵalary anyqtalǵan joq.

Alaıda ol Qytaıdaǵy Jańa jyl merekesi kezeńinde el ishinde adamdardyń júrip-turýy men kóptep jınalýyna baılanysty epıdemııanyń taralý qaýpi ósip jatqanyn eskertip, osyǵan baılanysty «qyraǵy bolýǵa» shaqyrdy.

Eske sala ketsek, Qytaıda jańa jyl 12 aqpan, juma kúni bastalady.