Qytaıda koronavırýs juqtyrǵandardyń sany kún sanap ósýde

BEIJІŃ. QazAqparat –Qytaıda bir táýlik ishinde koronavırýs juqtyrýdyń jańa rastalǵan oqıǵalar sany ekinshi kún qatarynan 100-den asty, dep habarlaıdy QazAqparattyń Qytaıdaǵy menshikti tilshisi.

Qytaıdyń densaýlyq saqtaý isteri jónindegi memlekettik komıteti taratqan málimetke qaraǵanda, elde sońǵy táýlikte (29 shildedegi jaǵdaı boıynsha) koronavırýs juqtyrýdyń 102 rastalǵan oqıǵasy tirkelgen, sonyń ishinde 96-sy – Shyńjań-Uıǵyr avtonomııalyq aýdanynda (ShUAA), beseýi Lıaonın provıntsııasynda jáne bireýi – Beıjiń qalasynda tirkelgen.

«Shyńjańda COVID-19 juqtyrýdyń 414 rastalǵan oqıǵasy tirkeldi, sonyń ishinde 412 oqıǵa - Úrimjide, sondaı-aq, aýrý belgilerinsiz júrgen 143 adam (140 adam Úrimjide) anyqtaldy. 12 myńnan astam adam dárigerler qaraýynda», - delingen QHR densaýlyq saqtaý isteri jónindegi memlekettik komıtettiń aqparattyq bıýlleteninde.

Qytaıda koronavırýs juqtyrýdyń 84 165 rastalǵan oqıǵasy anyqtalǵan. Aýrýhanadan 78 957 adam emdelip shyǵaryldy. Vırýstan 4634 adam qaıtys boldy. Qazirgi kezde 547 naýqas statsıonarlyq em qabyldaýda (sonyń ishinde 33 adam aýyr halde jatyr).

Eske sala keteıik, keshe Shyńjańda koronavırýsqa shaldyqqandardyń rekordtyq sany tirkeldi. Qytaıdyń birneshe óńirinde koronavırýstyń oshaǵy anyqtalǵany týraly habarlaǵan bolatynbyz.