Qytaıda koronavırýs juqtyrǵandardy bir ortalyqta oqshaýlap ustaý toqtatyldy

BEIJІŃ. QazAqparat – QHR-da endi koronavırýs ınfektsııasyn juqtyrǵandar úıden emdele alady nemese medıtsınalyq mekemeniń kómegine júginýine bolady, dep habarlaıdy QazAqparattyń menshikti tilshisi.

COVID-19-ǵa dıagnostıka jasaý jáne emdeý hattamasynyń jańartylǵan nusqasyna silteme jasaǵan «Sınhýa» agenttiginiń habarlaýynsha, Qytaıda COVID-19-ǵa shaldyqqandardy karantın ortalyqtarynda oqshaýlaý alynyp tastaldy. Buǵan deıin Qytaı bıligi koronavırýsty múldem taratpaý saıasatyn júrgizip, QHR-diń barlyq ákimshilik-aımaqtyq mekemelerinde koronavırýs ınfektsııasyn juqtyrǵan adamdarǵa arnap karantın ortalyqtaryn salǵan bolatyn.
Endi naýqastarǵa aýrýhanadan shyqqanda koronavırýstyń bar-joǵyn anyqtaıtyn PTR-testtiń teris nátıjesi qajet emes. COVID-19-ǵa dıagnostıka jasaý jáne emdeýdiń jańa hattamasynda aýrý buryn «jańa koronavırýs pandemııasy» bolsa, endi «jańa koronavırýs ınfektsııasy» bolyp ózgergen.
Buǵan deıin QHR Densaýlyq saqtaý isteri boıynsha memlekettik komıtettiń sheshimi boıynsha koronavırýsqa qarsy kúres sharalarynyń sanaty eń joǵarǵy A-dan V-ǵa túsken bolatyn.
Qytaı aýrýlardy baqylaý jáne aldyn alý ortalyǵynyń 2023 jyldyń 6 qańtaryndaǵy deregine sáıkes, qurlyqtyq Qytaıda ótken táýlikte 10,6 myń adam koronavırýs juqtyrǵan. Densaýlyq týraly málimet jınaıtyn Airfinity brıtandyq kompanııasynyń zertteýi boıynsha, COVID-ten táýligine 9 myń adamǵa deıin qaıtys bolǵan. Pandemııa bastalǵaly QHR-da koronavırýstan 5267 adam qaıtys boldy.

Foto: AP Photo