Qytaıda koronavırýs juqtyrǵan adamdar sany artyp keledi

BEIJІŃ. QazAqparat – Sońǵy táýlikte Qytaıda koronavırýs juqtyrǵan 40 jańa jaǵdaı anyqtaldy, olardyń arasynda kóz jumǵandar joq, dep habarlaıdy QazAqparattyń Qytaıdaǵy menshikti tilshisi.

QHR Gıgıena jáne densaýlyq saqtaý isteri jónindegi memlekettik komıtetiniń habarlaýynsha, 11 maýsymnan beri sońǵy bes kún ishinde koronavırýs juqtyrǵan jańa jaǵdaılar sany Qytaı astanasynda 100 adamnan asty. Olardyń basym kópshiligi Beıjińniń ońtústik-batys bóligindegi «Sınfandı» kóterme azyq-túlik bazarynan anyqtaldy.

Beıjińdegi «Fentaı» aýdanynda «áskerı jaǵdaı rejımi» engizildi. Onda «Sınfandı» bazaryna jaqyn ornalasqan 20-dan astam turǵyn úı kesheni karantınge jabyldy. Koronavırýstyń órshýine baılanysty Beıjińniń basqa aýdandarynda epıdemıologııalyq qaýip deńgeıi kóterildi.

Beıjiń bıligi bıylǵy jyldyń 30 mamyrynan beri osy bazarǵa kelgen 200 myńǵa jýyq turǵynnyń páterlerin aralap tekserýge, 100 myńǵa jýyq áleýmettik qyzmetkerdi jumysqa tartty.

90 myńǵa jýyq turǵyn COVID-19-ǵa test tapsyrdy.

Jergilikti BAQ-tyń habarlaýynsha, Beıjiń qalasy Infektsııalyq aýrýlardy baqylaý jáne aldyn alý ortalyǵynyń sarapshylary elorda halqyn jappaı testileý qajet degen qorytyndyǵa áli kelgen joq.

Eske salsaq, Qytaıda bir táýlikte 77 myńǵa jýyq adam koronavırýske test tapsyrdy. Keshe vırýstyń taralýyna baılanysty Beıjińniń úsh aýdany men mańyndaǵy qalalarda áskerı jaǵdaı engizilgeni týraly habarlaǵan edik.