Qytaıda koronavırýs órshidi, mektepter jabylyp, avtobýstar toqtady

BEIJІŃ. QazAqparat – Úshinshi kún qatarynan Qytaıda koronavırýs juqtyrǵandar sany kúrt artýda, dep habarlaıdy QazAqparat menshikti tilshisi.

Sońǵy kúnderi Qytaıda vırýs juqtyrýdyń jergilikti jaǵdaılary kúrt artty, olardyń basym bóligi – sımptomsyz.

Jergilikti BAQ málimetinshe, elde vırýsty juqtyrýdyń táýliktik jaǵdaılary 2020 jyldyń basynda tirkelgen kórsetkishten asady.

COVID-19 juqtyrý oshaqtary kem degende 17 provıntsııa, avtonomııalyq aýdan men ortalyqqa baǵynatyn qalada ornalasqan. Olardyń qatarynda Beıjiń, Shanhaı jáne Gýanchjoý megapolısteri bar.

9 mıllıon turǵyny bar Chanchýn qalasynda (Tszılın soltústik-shyǵys provıntsııasynyń ákimshilik ortalyǵy) tolyq oqshaýlaý rejımi engizildi. Barlyq bilim berý mekemeleri, saýda oryndary (sýpermarketterdiń shekteýli sany men dárihanalar jumysyn jalǵastyrady) men qoǵamdyq tamaqtaný oryndary jabylyp, qalalyq qoǵamdyq kólik jumysy tolyǵymen toqtady. Jappaı koronavırýsqa test tapsyrýdyń ekinshi kezeńi bastaldy.

Qytaıdyń densaýlyq saqtaý isteri jónindegi memlekettik komıtettiń derekterine saı, ótken táýlikte Qytaıda koronavırýs juqtyrýdyń 476 jaǵdaıy, 1 048 sımptomsyz jaǵdaı tirkelgen.