Qytaıda koronavırýs ınfektsııasyn juqtyrǵandardyń sany 42 myńnan asyp ketti

NUR-SULTAN. QazAqparat – Densaýlyq saqtaý mınıstrliginiń Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary, Qazaqstannyń bas sanıtarlyq dárigeri Jandarbek Bekshın Qytaıda koronavırýstan kóz jumǵandardyń sany 1016-ǵa jetkenin málim etti, dep habarlaıdy QazAqparat tilshisi.

«11 aqpanda QHR-dyń barlyq provıntsııalarynda, avtonomdy aýdandarynda jańa koronavırýstyq pnevmanııanyń 42648 rastalǵan jaǵdaıy tirkeldi. Onyń ishinde 1016-y ólimmen aıaqtalǵan. Ólim kórsetkishi 2,3 paıyz. 3396 adam (9,3 paıyzy) saýyǵyp shyǵaryldy. Álemde 27 elde koronavırýstyń jańa túrimen syrqattanýdyń 448 rastalǵan jaǵdaıy tirkeldi. Bul rette QHR-da syrqattanýdyń ósý qarqyny 31 qańtardan bastap 11 aqpan aralyǵynda 3,6 ese – 22 paıyzdan 6,1 paıyzǵa deıin tómendedi. Bul – QHR-da epıdemıologııalyq jaǵdaıdyń turaqtalý úrdisi baıqalǵanyn kórsetedi», - dedi Jandarbek Bekshın OKQ-da ótken baspasóz máslıhatynda.

Onyń aıtýynsha, Qazaqstanda koronavırýstyń taralýyna jol bermeý maqsatynda osy jyldyń 6 qańtarynan bastap memlekettik shekara arqyly ótetin barlyǵy 260 myń adam qaralǵan.

«Onyń ishinde QHR-dan kelgeni - 30852 adam. Búgingi tańda temperatýramen jáne JRVI bar 140 adam emdeýge jatqyzyldy. Onyń 113-i saýyǵyp shyqty. 27-i statsıonarda jatyr. Naýqastardyń jaǵdaıy qanaǵattanarlyq. Emdeýge jatqyzylǵan adamdardyń eshqaısysynda koronavırýs anyqtalǵan joq. Medıtsınalyq uıymdar Qytaıdan kelgen 23 myń adamnyń densaýlyǵyna kúni boıy monıtorıng jasaıdy. Búgingi kúni ınkýbatsııalyq kezeńniń aıaqtalýyna baılanysty 15478 adam monıtorıngten alyndy. 8690 adam medıtsınalyq baqylaýda tur. Eshkim de koronavırýstyq ınfekıtsııa kúdigi tirkelgen joq», - dedi ol.