Qytaıda qolamen qaptalǵan ejelgi zamanǵy patsha kúımesi tabyldy
ASTANA. QazAqparat - Qytaı arheologtary qazba jumystary barysynda 2,4 myń jyl burynǵy, Chýntsıý dáýirine jatatyn patshanyń eki aıaqty kúımesin tapty.
Munymen Chjen patshalyǵynyń bıleýshisi júrgen. Qazba jumystary qazirgi Henan provıntsııasy aýmaǵynda (Ortalyq Qytaı), Sınchjen qalasyna jaqyn mańda bes aıdan beri júrgizilýde.
Kúıme ǵalymdardy óziniń úlkendigimen jáne sán-saltanatymen tańdandyrdy. Arbanyń uzyndyǵy 2,56 metr, eni 1,66 metr, kúnnen jáne jańbyrdan qorǵaıtyn arnaıy shatyry da bar. Sondaı-aq qolamen qaptalyp, súıekterden oıyp órnekter jasalǵan. Ár dońǵalaǵynda 62 shabaqtan bar. Bul onymen júretin adamnyń áleýmettik mártebesi joǵary ekendigin kórsetedi.
Eki aıaqty kúıme bıleýshi Chjenniń mazarynan tabyldy jáne onyń o dúnıedegi saparyna arnalǵan.
«Bul biz tapqan kúımelerdiń ishindegi eń úlkeni jáne eń sándisi»,-deıdi Henan ınstıtýty arheologtar tobynyń jetekshisi Ma Tszıýntsaı.
Onyń aıtýynsha, eejelgi kólik quraly barynsha qolaıly. Munda turýǵa da, otyrýǵa da, tipti jatýǵa da bolady. Sondaı-aq qazba barysynda taǵy tórt kúıme tabylǵan. Bári sol kezeńdegi Chjen astanasyna, batysqa qaraı júrip bara jatqandaı áser qaldyrady.
Qazirgi júrip jatqan qazba jumystaryn qyrkúıekke deıin aıaqtaý josparlanyp otyr. Qorymda jalpy úsh myńnan astam qabir bar, dep jazady Sınhýa.
