Qytaıda ken óndirý jáne metallýrgııa salasynda 1,8 mln jumysshy qysqartylady
ASTANA. QazAqparat - Qytaıda ken óndirý jáne metallýrgııa salasynda 1,8 mln jumysshy qysqartylady. Bul týraly QHR Eńbek resýrstary jáne áleýmettik qamtamasyz etý mınıstri In Veımın málim etti, dep habarlaıdy reseılik TASS agenttigi.
«Artyq óndirý deńgeıin qysqartý bıylǵy jyldyń basty mindeti. Alaıda biz ekonomıkanyń basqa salalarynda jańa jumys oryndaryn ashýǵa basa mán beremiz», - dedi mınıstr.
«Aldyn ala esep boıynsha kómir óndirý salasynda 1,3 mln adam, al bolat qorytý salasynda 500 myń adam qysqartylady. Jalpy alǵanda 1,8 mln adam basqa oryndarǵa jumysqa ornalastyrylady», - dedi In Veımın.
Mınıstrdiń aıtýyna qaraǵanda, úkimet jumysshylardy basqa mamandyqtarǵa daıarlaýǵa, jumysqa ornalastyrýǵa, olarǵa ótemaqy berýge qatysty baǵdarlama ázirlegen. Osy sharalarǵa 15 mlrd dollar qarastyrylǵan.
