Qytaıda qazaqstandyq maıdangerlerdi eske aldy (FOTO)
BEIJІŃ-ChJANBEI. QazAqparat - Búgin QHR-da akkredıttelgen Qazaqstan, Mońǵolııa, Reseı, Belarýs, Armenııa, Tájikstan, Ázerbaıjan, Qytaı jáne Túrkimenstan áskerı-dıplomatııalyq korpýsynyń ókilderi Chjantszıakoý ýezi Chjanbeı kentinde (Beıjińnen 245 km) Ekinshi dúnıejúzilik soǵys zamanynda Qytaıdy azat etý kezinde qaza tapqan keńes jáne mońǵol áskerleriniń memorıalyna gúl shoqtaryn qoıdy.
Sharaǵa qatysýshylar baýyrlastar qorymy men murajaıǵa baryp, qurmetti qonaq kitapshasyna jazba qaldyrdy.
Eskertkishte 13 mońǵol jáne 66 keńes jaýyngeriniń aty jazylǵan. Solardyń ishinde qazaqstandyqtar Aýnzhan Japarov, Tólembek Ótebaev jáene Áselhan Berbekov bar. Qorymǵa 60 jaýyngerdiń máıiti jerlengen. Іz-túzsiz joǵalǵandardy izdestirý áli kúnge deıin toqtalmaǵan.
Uly Otan soǵysy kezinde Qazaqstan aýmaǵynan shaqyrtylǵan qaza tapqan jáne iz-túzsiz joǵalǵan jaýyngerlerdiń málimetter qoryna qarasaq (QR Qorǵanys mınıstrliginiń «Memorıal» DB ), Aýnzhan Japarov 1923 jyly OQO, Kırov aýdany, Molotovskıı keńsharynda dúnıege kelgen. Ol 1942 jyly áskerge shaqyrtyldy. 27-shi jeke motoatqyshtar brıgadasynyń quramynda bolǵan, 1945 jyly 21 tamyzda qaza tapty. Ókinishtisi «Memorıalda» T.Ótebaev jáne A.Berbekov týraly esh málimet joq.
Eske sala keteıik, 2015 jyly qyrkúıektiń basynda Heılýntszıan provıntsııasy Mýdantszıan qalasyndaǵy memorıaldyq saıabaqta Qytaıdy japon basqynshylarynan azat etý kezinde qaza tapqan taǵy bir qazaqstandyq Smaǵul Maıdartyń máıiti qaıta jerlendi. Jaýynger 1945 jyly 15 tamyzda qaza tapqan.
