Qytaıda Qazaqstan ulttyq pavılony ashyldy

IÝ. QazAqparat – Qytaıdyń shyǵysynda Chjetszıan provıntsııasynda ornalasqan Iý qalasynda Qazaqstan ulttyq pavılony ashyldy. Saltanatty shara Qazaqstan Respýblıkasynyń Táýelsizdik kúni qarsańynda ótti, dep habarlaıdy «QazAqparat» HAA menshikti tilshisi.

Mamandandyrylǵan kóterme-bólshek saýda ortalyǵy QHR-da Qazaqstan taýarlaryn dáripteýge yqpal etpek. Onda qytaılyq tutynýshylar Qazaqstanda keńinen tanylǵan tanymal azyq-túlik jáne toqyma ónimderin satyp ala alady. Olardyń arasynda «Sultan» men «Aıan» markalarynyń makarondary, «Rahat» pen «Baıan Sulý» kondıterlik ónimderi, «Dala» tabıǵı shyryndary, Shyǵys Qazaqstannan ákelingen bal jáne «Caspi Lana Atyrau» túıe júninen jasalǵan kórpeleri bar.

Qazaqstan ónimderi Qytaıda tanymaldyqqa ıe bolyp jatyr, dep atap ótti birqatar qytaılyq reıteler kompanııasynyń ókilderi. Olar QR-dan QHR-ǵa ákelinetin taýarlardyń resmı dıstrıbıýteri bolýǵa daıyn ekendikterin jetkizdi.

Qazaqstan ulttyq pavılony Shanhaıdaǵy QR Bas konsýldyǵy men «El Tregi» qaýymdastyǵynyń qoldaýymen ashyldy. Qazirgi ýaqytta Qazaqstannan taýarlar jetkizý qunyn tómendetý boıynsha Qytaı logıstıkalyq jáne brokerlik kompanııalarymen jumystar júrgizilýde.