Qytaıda qazaq kásipkeri uly aqyn Abaıdyń balalyq shaǵy týraly anımatsııalyq fılm túsirýde

ASTANA. QazAqparat - Qytaıdyń Úrimshi qalasynda qazaq kásipkeri Ǵusman Qajytaı basshylyq etetin «Abaı joly» anımatsııalyq kompanııasy «Abaıdyń balalyq shaǵy» atty kóp bólimdi anımatsııalyq fılm túsirip jatyr, dep habarlanǵan QR Mádenıet jáne sport mınıstrliginiń saıtynda.

Joba avtorlarynyń sózine qaraǵanda, fılmdi túsirýdegi basty maqsaty - óskeleń urpaqtyń óz halqynyń mádenıeti men tarıhyna qyzyǵýshylyǵyn arttyryp, olardyń boılarynda qazaq ádebıetine maqtanysh sezimderi men qurmetti qalyptastyrý. 2014 jyldyń basynda qolǵa alynǵan jobaǵa sáıkes anımatsııalyq fılm 104 bólimnen turady. Qazirgi ýaqytta olardyń eki serııasy daıyn. Mýltfılmniń túsirilimi úsh jyl ishinde bitedi dep kútilýde. Sonymen qatar joba avtorlary tolyqmetrajdy mýltfılm túsirýdi josparlap otyr.