Qytaıda qarjy naryǵy retteýishiniń basshysy aýysty
ASTANA. QazAqparat - QHR baǵaly qaǵazdar naryǵyn retteý komıssııasynyń basshysy Sıao Gandy otstavkaǵa jiberdi, dep habarlady Bı-bı-sı memlekettik BAQ-qa silteme jasap.
Sınhýa agenttiginiń habarlaýynsha, bul sheshimdi QHR-daǵy basqarýshy Kommýnıstik partııasy habarlady.
Jańa basshy Qytaıdyń tórt iri bankteriniń biri Agricultural Bank of China bankiniń qazirgi basshysy - Lıý Shııýı bolady.
Sońǵy aılarda joǵaryda turǵan sheneýnikter Sıao Gannyń jumystaryn synǵa aldy.
Bılik saıasaty qarjy naryǵynda aktsııa qunynyń alypsatarlyq ósiminiń ulǵaıýyna alyp keldi.
Ótken jyldyń ortasynda aktsııa arzandap, Sıao Ganǵa baǵynysty komıssııa quldyraýdyń aldyn alý úshin qaryz aqshany paıdalaný qaǵıdasyn ózgertýdi sheshti.
Alaıda bılik sheshimi aktsııalar naryǵynda problemalardy ýshyqtyryp, quldyraýdy kúsheıte tústi.
Sıao Gan naryqta aktsııanyń qubylýyna yqpal etken birqatar sheshimder qabyldady, dep atap ótedi Wall Street Journal. Qytaıdaǵy jaǵdaıdyń nasharlaýy álemdik ekonomıkalyq ósimge eleýli áser etti.
