Qytaıda «Kalmedjı» taıfýny jaqyndap kele jatqandyqtan 90 myńnan astam adam qaýipsiz jerge kóshirildi
BEIJІŃ. QazAqparat - Búgin keshke Qytaıdyń ońtústik jaǵalaýynda «Kalmedjı» daýyly soǵady dep kútilýde, dep habarlady QHR azamattyq ákimshilik mınıstrligi.
Taıfýn seısenbi kúni tańerteń Ońtústik Qytaı teńiziniń shyǵys akvatorııasyna endi, saǵatyna 30 shaqyrym jyldamdyqpen Gýandýn provıntsııasy men Haınan kýrorttyq aralyna jyljyp keledi.
Boljam boıynsha, keshke taıfýnnyń qarqyndylyǵy 50 m/s-qa kúsheıýi múmkin. Onyń jyldamdyǵy men jeldiń kúshtiligin aǵymdaǵy jylǵy shildede Qytaıda 60-tan astam adamnyń ómirin qıǵan «Rammasýn» taıfýnymen salystyrýda.
Taıfýnnyń jaqyndaýynan jergilikti bılik 90 myń adamdy qaýipsiz jerge kóshirdi, 30 myń keme portqa keri qaıtaryldy, Ońtústik Qytaı teńizinde munaı platformasynan 6 myńnan astam jumysshy evakýatsııalandy.
Jergilikti BAQ habarlaýynsha, Ońtústik Qytaı teńizi aýdanynda daýyl kezinde shuǵyl jaǵdaı týyndaǵan jaǵdaıǵa 29 qutqarý korabli men eki tikushaq ázirlendi. Haıkoý qalasynda - Haınan provıntsııasynyń ákimshilik ortalyǵynda barlyq mektepter jabyldy, jergilikti turǵyndar aýyzsý men azyq-túlik ónimderin daıyndaýda.
Budan basqa, Gonkong halyqaralyq áýejaıynda 40-qa jýyq reıs toqtatylyp, 500-den astam reıs apat saldarynan keshigýde.
Meteorologtardyń boljaýynsha, Qytaı ońtústiginde taıaý kúnder jańbyr kúsheıip, jer-jerlerde nóserletip, jekelegen aýdandarda 450 mm-ge deıin jaýyn-shashyn bolady dep kútiledi.
