Qytaıda isti bolǵan qazaq qyzyn elge deportatsııalaý ázirge múmkin emes - QR SIM
ASTANA. QazAqparat - Qytaıda esirtki tasymaly úshin isti bolyp jatqan jáne ómir boıy bas bostandyǵynan aıyrylýy múmkin Aqjarqyn Turlybaıdy Qazaqstanǵa deportatsııalaý múmkindigi ázirge bola qoımaıdy. Bul týraly búgin QR Syrtqy ister mınıstrliginiń resmı ókili Altaı Ábıbýllaev málim etti.
«Eger Qazaqstan azamaty osy memlekette bas bostandyǵynan aıyrylsa, Qazaqstan men Qytaı arasynda tıesili kelisim bar ma, álde ol azamatty elge deportatsııalaý múmkindigi joq pa degen saýaldar kelip tústi. Osy suraqqa jaýap retinde aıtarym: 2011 jyly QR men QHR arasynda sottalǵan azamattardy ózara almasý jóninde kelisimge qol qoıylǵan bolatyn. Kelesimdi 2013 jyly Qazaqstan Parlamenti ratıfıkatsııalady. Ár kelisim halyqaralyq tájirıbege sáıkes, dıplomatııalyq úderisterge oraı, eki taraptyń ratıfıkatsııalanǵanynan keıin tıesili dıplomatııalyq arnalar arqyly ratıfıkatsııalyq notalarmen almasqannan keıin kúshine enedi. Sondyqtan qazirgi tańda bul ratıfıkatsııalaý máselesin Qytaı tarapy qarastyrýda. Biz Qazaqstan tarapynan eshqandaı qysym jasaı almaımyz. Biraq dıplomatııalyq arnalar arqyly, saıası deńgeıde osy kelisimdi ratıfıkatsııalaý jóninde óz ótinishimizdi ǵana bildire alamyz. Eger bul kelisim kúshine engen kúni sottalǵan azamattarmen almasý jónindegi tetiktermen odan arǵy qadamdar jaıly Bas Prokýratýra arqyly egjeı-tegjeıli aqparat alýǵa bolady», - deıdi ol.
Aıta keteıik, Qytaıda esirtkimen ustalǵan 20 jasar qazaq qyzy Aqjarqyn Turlybaıǵa qatysty sot úkimi shyqty. Birinshi ınstantsııa ony ómir boıy bas bostandyǵynan aıyrý týraly úkim shyǵarǵan bolatyn.
«Árıne, bul sot úkimimen Aqjarqyn bolsyn, onyń týǵan-týystary, zańgerleri men Qazaqstan tarapy jalpy kelispeıtindigin atap ótkim keledi», - dedi A. Ábıbýllaev, - Qazaqstan azamatynyń ómir boıy bas bostandyǵynan aıyrý sheshimine Aqjarqynnyń ózi de jáne advokattar kelispegendikten, bul máseleni kelesi sot deńgeıinde qarastyrý kózdelip otyr. Sot sheshimi áli kúshine engen joq. 10 kúnniń ishinde advokattar apellıatsııalyq shaǵym berýge quqyǵy bar. Sondyqtan, kúshine enbegen sot úkimin apellıatsııalyq satyda qarastyrý múmkindigi kelesi jarty jyldyń ishinde bolady. Ókinishtisi, osy jarty jyl ishinde Aqjarqyn abaqtyda otyrýǵa tıisti». Eske sala keteıik, Qytaıǵa shyqqan alǵashqy saparynda 20 jastaǵy qazaqstandyq boıjetken Aqjarqyn Turlybaı 3 naýryzda Gýanchjoý áýejaıynda ustalǵan bolatyn. Onyń sómkesinen qytaı polıtseıleri esirtki tapty. Qorǵaýshy tarap esirtki zattaryn Qytaıda Aqjarqynnyń sómkesine bireý salyp jiberýi múmkin ekenin aıtady.
