Qytaıda Interpoldyń burynǵy tóraǵasy sottaldy
Tıantszın qalasynyń soty 21 qańtarda Qytaıdyń burynǵy qoǵamdyq qaýipsizdik vıtse-mınıstri jáne Qytaı teńiz polıtsııasynyń burynǵy dırektory Men Hongveıdiń paraqorlyq isi boıynsha alǵashqy sot úkimin jarııa etti. Sottalýshy Men Hongveıge para alǵany úshin 13 jyl alty aıǵa bas bostandyǵynan aıyrý jazasy taǵaıyndalyp, 2 mıllıon ıýan aıyppul salyndy.
Sınhýa sottalýshynyń sot sheshimine baǵynǵanyn jáne shaǵymdanbaıtynyn málimdedi.
Sınhýa aqparat agenttiginiń habarlaýynsha, Men Hongveı qyzmet etken kezde ol óziniń jaǵdaıyn paıdalanyp, jalpy somasy 14,46 mıllıon ıýannan asatyn túrli para jınaǵan.
Eske sala ketsek, Men Hongveı 2016 jyldan 2018 jylǵa deıin Interpoldyń prezıdenti bolǵan. 2018 jyldyń qyrkúıek aıynyń sońynda Men Hongveı Interpolǵa tóraǵalyq etý kezinde Frantsııanyń shtab-páterinen Qytaıǵa oralǵannan keıin baılanysyn úzgen.
2018 jylǵy 8 qazanda Qytaıdyń Qoǵamdyq qaýipsizdik mınıstrligi Men Hongveıdiń para aldy degen kúdikpen tergeý júrgizilip jatqandyǵy týraly habarlady. 2019 jyly 10 mamyrda onyń ústinen paraqorlyq boıynsha qylmystyq is qozǵaldy. Sottyń alǵashqy otrysy sol jyldyń 20 maýsymynda ótken edi.