Qytaıda ınternet-sot iske qosyldy
ASTANA. QazAqparat - Qytaıdaǵy alǵashqy ınternet-sottyń resmı ashylý saltanaty juma kúni Chjetszıan provıntsııasyndaǵy Hanchjoý qalasynda ótti, dep habarlaıdy QHR Ortalyq telearnasy.
Juma kúni tańerteń ashylý saltanatyna QHR Joǵarǵy halyq sotynyń tóraǵasy Chjoý Tsıan men Chjetszıan provıntsııasy QHP komıtetiniń hatshysy Che Tszıýn qatysty.
Internet-sot onlaın saýdadadaǵy alaıaqtyqqa baılanysty, onlaın jasalǵan qaryz kelisimshartymen baılanysty, ǵalamtordaǵy avtorlyq quqyqtyń buzylýy týraly isterdi qaraıtyn bolady.
Barlyq sot protsedýralary, shaǵym túsirýden bastap isti qozǵaý - sottyń saıty arqyly júrgiziletin bolady. Sot tyńdalymy men úkimdi jarııalaý da naqty ýaqyt rejıminde onlaın vıdeotranslıatsııa kómegimen ótedi.
