Qytaıda H7N9 tumaýynyń taralýyna baılanysty qaýipsizdik sharalary qolǵa alyndy
ASTANA. QazAqparat - Qytaıda H7N9 qus tumaýynyń taralýyna baılanysty qaýipsizdik sharalary kúsheıtile bastady. Eldegi aýrýdyń aldyn alý jáne baqylaý ulttyq qyzmetiniń málimetine sáıkes, atalmysh vırýsty 96 adam juqtyryp, onyń 19-y kóz jumǵan. Dárigerler vırýstyń adamnan adamǵa juǵatynyn joqqa shyǵarmaı otyr.
Qytaılyq BAQ-tyń habarlaýynsha, eldiń birqatar aýdandarynda tiri qusty satýǵa tyıym salynǵan. Bul eskertý birinshi kezekte Chjetszıan provıntsııasyna qatysty. Sebebi, onda 49 adam osy dertti juqtyryp, 12 adam qaıtys bolǵan. Sondaı-aq qus fabrıkalary men jabaıy qustar mekendeıtin saıabaqtar baqylaýǵa alyndy.
Buǵan qosa, Shanhaıdaǵy qus bazary da jabyldy. Jyl basynan beri onda 8 adam qus tumaýyn juqtyryp, onyń teń jartysy kóz jumǵan. Gýandýn, Gonkong, Tszıansý, Fýtszıan jáne Hýnan óńirlerinde de atalǵan derttiń qurbandary týraly aqparat tarala bastady. Osyǵan oraı, eldiń ákimshilik ortalyǵyndaǵy bazarlarda 20 myń qustyń eti joıyldy. Dárigerler halyqqa tiri qustyń ornyna muzdatylǵan etti paıdalanýǵa keńes berip otyr, dep habarlaıdy ITAR-TASS.
