Qytaıda H3N8 qus tumaýynyń adamǵa juqqany anyqtaldy

BEIJІŃ. QazAqparat - Henan provıntsııasynda (Ortalyq Qytaı) H3N8 qus tumaýy vırýsyn juqtyrýdyń alǵashqy jaǵdaıy anyqtaldy. Bul týraly Qytaı Halyq Respýblıkasynyń gıgıena jáne densaýlyq saqtaý memlekettik komıtetiniń málimdemesinde aıtylǵan, dep habarlaıdy QazAqparat tilshisi.

Habarlamaǵa sáıkes, H3N8 qus tumaýynyń shtamyn juqtyrý oqıǵasy ortalyq Henan provıntsııasyndaǵy Chýmadıan qalasynda turatyn tórt jastaǵy balada anyqtaldy. Onyń úıiniń aýlasynda úı qustary bolǵan, turǵyn úılerdiń janynda jabaıy úırekter mekendegen.

Sáýirdiń 5-i kúni balanyń dene qyzýy kóterilip, 10 sáýirde jaǵdaıynyń nasharlaýyna baılanysty jergilikti medıtsınalyq mekemege jatqyzylǵan. 24 sáýirde Qytaıdyń aýrýlardy baqylaý jáne aldyn alý ortalyǵy naýqastyń qus tumaýynyń H3N8 shtamyn juqtyrǵanyn rastady.

«Qytaı epıdemıologtarynyń pikirinshe, bul H3N8 qus tumaýynyń vırýsy qustan adamǵa kezdeısoq taralýy bolyp sanalady jáne keń aýqymdy indet qaýpi ázirge tómen», - delingen qujatta.

H3N8 tumaýynyń shtamy jylqylarda, ıtterde, qus etinde jáne ıtbalyqtarda kezdesedi. Alaıda, buryn vırýstyń osy shtamymen adam aýrýy tirkelmegen. Qytaı sarapshylary halyqqa aýrý jáne óli qustarmen sondaı-aq múmkindiginshe tiri qustarmen de tikeleı baılanysta bolmaýǵa, tamaqtaný gıgıenasyn saqtap, shıki jáne daıyn ónimderdi bólek óńdeýge keńes beredi.