Qytaıda erejesiz jekpe-jekte ulty qazaq qarsylasyna judyryq jumsamaǵan A.Nurseıit óz áreketin túsindirip berdi
ALMATY. QazAqparat - Men baýyrmaldyqty sporttaǵy jeńisten, sporttyq prıntsıpterden joǵary qoıdym. Erejesiz jekpe-jekten qazaqstandyq sportshy, «Alem faıters» sport klýbynyń múshesi Aıbek Nurseıit búgin jýrnalısterge bergen suhbatynda osylaı dedi.
Esterińizge sala ketelik, taıaýda - 5 naýryz kúni erejesiz jekpe-jekten WBK tujyrymy boıynsha Qytaıdyń Shanhaı qalasy mańynda halyqaralyq týrnır ótken bolatyn. 70 keli salmaq dárejesinde óner kórsetken qazaqstandyq saıypqyran Aıbek Nurseıit pen Qytaıdaǵy qandasymyz Ǵabıt Turǵanbek fınalǵa deıin barlyq qarsylastaryn jeńip, aqtyq aıqasta kezdesken edi. Biraq, ekeýi de judyryqtasýdan bas tartyp, tek bir-birine ár túrli kúres tásilderin qoldanýmen boldy. Alǵashynda tóreshi ekeýine de eskertý jasaǵan. Biraq, bul áser etpegen soń, ekinshi raýndta tóreshi ekeýine de qyzyl kartochka kórsetip, saıysty toqtatty. Osylaısha, bul «bolmaǵan jekpe-jek» dep eseptelindi.
«Árıne, men bul týrnırden elime kók Týdy jelbiretip, jeńispen oralǵym keldi. Onyń ústine bul men úshin alǵashqy halyqaralyq jarys bolatyn. Bul týrnırde kórermender arasyndaǵy azyn-aýlaq qazaq qandastarymyzdyń maǵan qyzý qoldaý kórsetkeni maǵan erekshe áser etti. Al aqtyq synda baýyrmaldyqty, sporttaǵy jeńisten, sporttyq prıntsıpterden joǵary qoıdym. Sol fınalda qazaq áýenin áýeletip, segiz buryshqa birinshi bolyp men shyqtym. Al Ǵabıt qandasym Bekbolat Tileýhanov aǵamyzdyń «Alash urany» ánin asqaqtap shyqty. Buǵan deıin salmaq ólsheý rásiminde ǵana kezdesip qol alysqanymyz bolmasa, sóılesken emespiz. Sonda, aqtyq synda ekeýmiz qol alysqan sátte onyń kúlimdegen kózinen baýyrmaldyqtyń, elge degen saǵynyshtyń lebin sezdim. Sol úshin de baýyrymdy urý men úshin ersi bolyp kórindi. Men bul áreketime esh ókinbeımin. Bul meniń ata-anamnyń, bapkerlerimniń tárbıesi dep bilem», - dedi Aıbek Nurseıit.
Degenmen, ol týrnırden shettetilmegendigin jetkizdi.
«Bizge tóreshi qyzyl kartochka kórsetti. «Barlyǵy bitti» dep oılap edim. Biraq, keıin banket kezinde WBK prezıdenti janyma kelip, meniń jartylaı fınalda myqty frantsýz sportshysy Maıkl Dýboısty aıqyn basymdyqpen jeńgenime tánti ekendigin aıtyp, kelesi týrnırge qatysýǵa ruqsat berdi. Al Ǵabıttiń jaǵdaıynan habarsyzbyn. Endi qudaı qalasa, bir aptadan keıin, aldaǵy mamyr aıynda bolatyn kezekti týrnırge daıyndalamyn. Onda 70 keli salmaq dárejesinde 16 myqty saıypqyran qatysady», - dedi A. Nurseıit.
