Qytaıda er adam balabaqshaǵa shabýyl jasap, 6 adamdy pyshaqtady
BEIJІŃ. QazAqparat – Qytaıdyń ońtústik-shyǵysyndaǵy Gýandýn provıntsııasynda er adam balabaqshaǵa pyshaqpen shabýyl jasap, alty adam mert boldy, bireýi jaralandy, dep habarlaıdy QazAqparat BBC News-ke silteme jasap.
Polıtsııa 25 jastaǵy er adamdy tutqyndaǵanyn jáne shabýyl sebepterin anyqtap jatqanyn málimdedi. Qurbandardyń arasynda bir muǵalim, eki ata-ana men úsh bala bar. Oqıǵa «qasaqana jasalǵan shabýyl» dep ataldy.
Polıtseılerdiń sózinshe, shabýyl dúısenbi kúni jergilikti ýaqytpen 07:40-ta jasalǵan.
Qytaıda kúsh kórsetip jasalatyn qylmys basqa eldermen salystyrǵanda sırek, biraq keıingi jyldary elde pyshaqpen shabýyl jasaý jıilep ketti. Onyń birnesheýi mektepte bolǵan.
Byltyr tamyzda pyshaq ustaǵan er adam ońtústik-shyǵystaǵy Tszıansı provıntsııasyndaǵy balabaqshaǵa basa-kóktep kirip, úsh adamdy óltirip, alty turǵyndy jaraqattaǵan. 2021 jyldyń sáýirinde Gýansı-Chjýan avtonomdy aýdanynyń Beılıý qalasynda pyshaqpen jasalǵan shabýyl saldarynan eki bala qaza taýyp, 16 adam jaraqat aldy. 2018 jyldyń qazanynda Qytaıdyń ońtústik-batysynda Chýntsındegi balabaqshada 14 bala pyshaqtan jaraqat aldy.
