Qytaıda ekinshi ushaq tasyǵysh kemeniń qurylysy bastaldy
BEIJІŃ. Qaz|Aqparat - QHR-nyń Tszıansý provıntsııasynyń Chanchjoý qalasynda úkimettiń «Sina Weibo» áleýmettik jelisindegi resmı paraqshasynda «Shangshang Cable Group» kompanııasynyń eldiń ekinshi ushaq tasyǵysh kemesiniń qurylysy úshin jabdyqtardy jetkizý tenderin jeńip alǵany týraly aqparat paıda boldy. Bul týraly «Global Times» habarlaıdy.
Maqala «Chanchjoýdyń keshki jańalyqtary» saıtyna kóshirilip basylǵan, biraq birshama ýaqyttan keıin eki jarııalanym da alynyp tastaldy. «Bul Qytaıdyń óziniń ekinshi ushaq tasyǵysh kemesin sala bastaǵany týraly rastaıtyn birinshi aqparat. «Shangshang Cable Group» kompanııasy symdar men kabelderdi óndirýden Qytaıda 1-shi, álemde 10-shy oryn alady, ol «Lıaonın» kemesiniń qurylysyna qatysqan», - dep jazady basylym. Áskerı teńiz sarapshysy Lı Tszeniń aıtýynsha, «aımaqtyq derjavanyń áýe men teńiz ústin baqylap otyrýy úshin úsh, áıtpese kem degende eki ushaq tasyǵysh kemesi bolýy kerek». Basqa áskerı sarapshy Lı Sıaotszıan jabdyqtardy jetkizý tenderiniń ótkizilgenin esepke ala otyryp, jańa ushaq tasyǵysh kemeniń syzbanusqasy jasalǵanyna senimdi ekenin bildirdi. Esterińizge sala keteıik, 2012 jyly Qytaıda keńestik «Varıag» ushaq tasyǵyshyn jańǵyrtý jolymen «Lıaonın» atty birinshi ushaq tasyǵysh kemesi paıdalanyla bastady. Qytaılyq tarap ony 2008 jyly Ýkraınadan satyp alǵan.
