Qytaıda «dirildegen» záýlim ǵımarat kópshilikti qorqytty

ShENЬJENЬ. QazAqparat – Seısenbi kúni kúndiz Qytaıdyń Shenjen qalasyndaǵy kóshelerdiń birinde bıiktigi 355 metr bolatyn «SEG Plaza» záýlim ǵımaraty dirildeı bastaǵany belgili boldy. Qalada da, jaqyn mańda da eshqandaı jer silkinisi bolmaǵany atap ótildi, dep habarlaıdy QazAqparat Global Times-qa silteme jasap.

«Dirildegen» ǵımarat túsip qalǵan vıdeo seısenbi kúni Sina Weibo áleýmettik jelisinen taralyp, kóp qaralym jınaǵan. Beınejazbadan bıik ǵımarat dirildeı bastaǵanda adamdardyń qorqyp, jan-jaqqa qashqanyn kórýge bolady.

Ǵımarat aldyndaǵy aldań ýaqytsha jabylǵany habarlandy. Oqıǵany órt sóndirý qyzmeti men polıtsııa tekserip jatyr.

Seısenbi kúni kúndiz Sina Weibo-nyń resmı akkaýntyndaǵy jergilikti úkimettiń málimdemesinde keshe jergilikti ýaqyt boıynsha 12:31-de ǵımarattyń dirildegeni týraly alańdaǵy kezekshi qyzmetkerlerge habarlanǵany aıtylǵan. Sodan keıin ǵımarat ákimshiligi shuǵyl evakýatsııa týraly adamdarǵa jedel túrde habardar etken. Saǵat 13:55-te barlyǵy qaýipsiz jerge kóshirildi.

Záýlim ǵımarat ornalasqan Fýtıan aýdanynyń úkimeti tótenshe jaǵdaıdy joıý úshin dereý sharalar qabyldady. Ǵımarattyń qaýipsizdigin tekserý úshin sarapshylar shaqyryldy. Aldyn ala tergeý nátıjeleri jaqyn jerde jaryqshaqtar bolmaǵanyn anyqtady, sondaı-aq qabyrǵa panelderiniń qulaý jáne olarǵa zaqym keltirý belgilerin de anyqtamady, dep habarlaıdy Weibo.

Oqıǵanyń mán-jaıy men sebepteri boıynsha qosymsha tergeý amaldary júrgizilýde, olar ýaqytyly jarııa etiletin bolady.

Ǵımarat saǵat 13:30-da dirildeýin toqtatty, ǵımarattyń negizgi qurylymynda jáne onyń aınalasynda qaýipsizdik normalarynan aqaýlar tabylǵan joq, dep habarlady qalalyq turǵyn úı-qurylys bıýrosy sol kúni resmı Weibo akkaýyntynda.