Qytaıda dınozavrdyń 80 jumyrtqasyn urlap ketken
ASTANA. QazAqparat - Qytaı polıtsııasy dınozavrdyń tasqa aınalǵan 80 jumyrtqasyn urlady degen kúdik keltirilgen 4 adamdy ustady.
Prokýratýranyń málimeti boıynsha, qolǵa túskenderdiń biri - Van satyp alýshy retinde Chjetszıan provıntsııasyndaǵy Tıantaı qalasynda turatyn kollektsıonerdiń úıine barǵan.
9 qańtarda túnde ol óziniń úsh sybaılasymen birge kollektsıonerdi tonap, 80 dınozavrdyń jumyrtqasyn alyp ketken, dep jazady China Daily resmı úkimetke silteme jasap.
Odan ári sybaılastar jumyrtqany ózara bólisken. 27 danasyn Van alǵan. Urlanǵan qundy zattardy polıtsııa Heılýntszıan provıntsııasyndaǵy Hýanan úezinde turatyn Vannyń úıin tekserý kezinde tapty. Qalǵandary da qolǵa tústi. Biraq 50 jumyrtqanyń taǵdyry ázirge belgisiz bolyp otyr.
Heılýntszıan polıtsııasy Vannyń qamaýda ekendigin rastady, biraq qalǵandary jaıly aıtýdan bas tartty.
Ǵalymdardyń pikirinshe, Shyǵystaǵy Chjetszıan provıntsııasynda ejelgi Bor dáýiri kezeńinde túrli dınazavrlar tirshilik etken. Bul aýmaqta 6 jyl boıy 11 myń sharshy metr aýmaqta, 82 jerde zertteý jáne qazba jumystary júrgizilgen.
Arheologııalyq jumystar barysynda kem degende dınozavrdyń 8 túriniń qaldyqtary jáne tasqa aınalǵan jumyrtqalardyń 25 túri tabylǵan.
«Chjetszıande bor dáýiri kezeńinde, 65-145 mıllıon jyl buryn asa kóp dınozavrlar meken etkeni dáleldendi»,-dep habarlady Chjetszıans jaratylys taný-tarıhı mýzeıi tálimgeriniń orynbasary Tszın Sınshen.
Qazirgi ýaqytta tasqa aınalǵan dınozavr jumyrqalarynyń eń kóp rekordty tabylýy - Gýandýn provıntsııasyndaǵy Heıýan qalasynyń enshisinde.
Munda 1996 jyldan beri 17 myń tasqa aınalǵan qaldyqtar tabylǵan.
Sodan da bolar, Heıýan qalasyn ǵalymdar «paleontologtar peıishi» dep ataıdy. Tasqa aınalǵan dınozavrlar ǵalymdardy ǵana emes, kontrabandashylardy da qyzyqtyrýda. Olar sheteldik kollektsııa jınaýshylarǵa satý úshin urlyqqa barady.
