Qytaıda demalyp kelgen kókshetaýlyq balalardan koronavırýs ınfektsııasy tabylmady
KÓKShETAÝ. QazAqparat – Qytaıda demalyp kelgen kókshetaýlyq balalardan koronavırýs ınfektsııasy anyqtalmady. Balalardan tumaýdyń A tıpi tabyldy, dep habarlaıdy QazAqparat tilshisi Aqmola oblystyq densaýlyq saqtaý basqarmasyna silteme jasap.
Aıta keteıik, Telegram áleýmetik jelisinde Kókshetaýdaǵy juqpaly aýralar aýrýhanasyna koronavırýs kúdigimen naýqas tústi degen aqparat taraǵan bolatyn.
Osyǵan oraı, QazAqparat tilshisi Aqmola oblystyq densaýlyq saqtaý basqarmasyna habarlasyp, mán-jaıdy surap bilgen edi.
Vedomstvodan atap ótkendeı, búgin qańtardyń 28-de JRVI (jedel respıratorlyq-vırýstyq ınfektsııalary) dıagnozymen 2 jáne 5 jasar eki bala oblystyq kópbeıindi balalar aýrýhanasyna túsken. Atalmysh otbasy 6-21 qańtar aralyǵynda Qytaıda (Haınan) demalysta bolǵan.
Aqmola oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti naýqastardan koronavırýs ınfektsııasyna baılanysty synama aldy. Ata-anasy men balanyń úlkeninde JRVI (jedel respıratorlyq-vırýstyq ınfektsııalary) belgileri tabylmady. Synama qorytyndysy birer saǵatta daıyn bolady degen edi.
«Aqmola oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti saraptama qorytyndysy boıynsha oblystyq kópbeıindi balalar aýrýhanasyna túsken naýqastardan tumaýdyń A túri anyqtaldy, koronavırýs ınfektsııasy rastalmady», - dep túsindirdi Aqmola oblystyq densaýlyq saqtaý basqarmasynyń baspasóz qyzmeti.
