Qytaıda COVID-19-ǵa qarsy 900 mln doza vaktsına egildi
BEIJІŃ. QazAqparat – Qytaıda koronavırýs ınfektsııasyna qarsy 900 mln doza vaktsına egildi. Bul týraly Qytaıdyń Densaýlyq saqtaý jónindegi memlekettik komıtetiniń málimdemesinde aıtylǵan, dep habarlaıdy QazAqparattyń menshikti tilshisi.
Beıindi vedomstvonyń deregine saı, sársenbidegi jaǵdaı boıynsha eldiń 31 provıntsııasy (avtonomııalyq aýdandar, ortalyqqa baǵynatyn qalalar) men Shyńjań óndiristik-qurylys korpýsynda koronavırýsqa qarsy barlyǵy 923 910 000 doza vaktsına egilgen.
Ótken táýlikte qurlyqtyq Qytaıda COVID-19 juqtyrýdyń jańa 19 oqıǵasy (olardyń tórteýi -jergilikti) tirkelgen, ólim sany joq. Koronavırýs juqtyrýdyń jergilikti oqıǵalarynyń tórteýi de Qytaıdyń ońtústigindegi Gýandýn provıntsııasynda anyqtalǵan.
Sońǵy resmı derekterge sáıkes, qurlyqtyq Qytaıda COVID-19 juqtyrǵan naýqastardyń 94,39%-y emdelip shyqqan. 2019 jyldyń jeltoqsanynan bastap koronavırýs juqtyrǵandardyń sany 91 511 adamǵa jetti. Ólim kórsetkishi – 5,06% (koronavırýstan 4 636 adam qaıtys boldy).
Eske sala keteıik, Qytaıdyń Densaýlyq saqtaý jónindegi memlekettik komıtetinde osy jyldyń sońyna deıin halyqtyń kem degende 70%-y COVID-19-ǵa qarsy vaktsına alady dep kútiledi.
