Qytaıda COVID-19-ǵa qarsy 800 mıllıonnan asa vaktsına salyndy
BEIJІŃ. QazAqparat – Qytaıda jańa koronavırýs ınfektsııasyna qarsy 800 mıllıonnan asa vaktsına salyndy. Bul týraly sársenbi kúni Qytaıdyń Densaýlyq saqtaý isteri jónindegi memlekettik komıtetinen málim etti, dep habarlaıdy QazAqparattyń menshikti tilshisi.
Beıindi vedomstvonyń resmı derekteri boıynsha, 2021 jyldyń 9 maýsymynda 31 provıntsııa men Shyńjań óndiristik-qurylystyq korpýsynda barlyǵy koronavırýsqa qarsy vaktsınanyń 808 962 000 dozasy egilgen.
Qytaıdyń Densaýlyq saqtaý isteri jónindegi memlekettik komıteti osy jyldyń aıaǵyna deıin halyqtyń kem degende 70%-y COVID-19-ǵa qarsy ekpe alady dep kútedi.
Ótken táýlikte qurlyqtyq Qytaıda COVID-19 juqtyrýdyń 16 jańa oqıǵasy (olardyń 8-i – jergilikti) tirkelgen, ólim sany joq. Koronavırýsty jergilikti juqtyrýdyń segiz oqıǵasy da Qytaıdyń ońtústigindegi Gýandon provıntsııasynda anyqtalǵan.
Sońǵy resmı derekterge súıensek, qurlyqtyq Qytaıda COVID-19 juqtyrǵan naýqastardyń 94,47%-y jazylyp shyqqan. 2019 jyldyń jeltoqsanynan bastap koronavırýs juqtyrǵandar sany 91 316-ǵa jetti. Ólim kórsetkishi – 5,07% (koronavırýstan 4 636 adam qaıtys bolǵan).
Rýslan Súleımenov
