Qytaıda búrkit salýdan chempıonat ótti
ASTANA. QazAqparat - Qytaıdyń Shyńjan-Uıǵyr avtonomııalyq ólkesi Іle-Qazaq avtonomııalyq oblysynyń Shińgil aýdanynda búrkit salýdan chempıonat ótti. Óńirde umytyla bastaǵan qazaqtyń bekzada ónerin jandandyrý úshin ótken sharaǵa 67 qusbegi qatysty, dep habarlaıdy 24.kz.
Bul - Qytaıdyń Іle-Qazaq avtonomııalyq oblysynda ótip jatqan 3-búrkitshiler chempıonaty. Ádettegideı saıysta qyran qusty qolǵa shaqyrý, ıesi men búrkittiń arasyndaǵy baılanys baǵalandy. Sodan keıin qanattyny qoıanǵa salyp, ushqyrlyǵyn, aıla-tásilin tekserdi. Jalpy, Shyńjandaǵy qazaqtar búrkit salýdan jazǵy jáne qysqy chempıonatty turaqty túrde ótkizip turady. Jat jerde babadan qalǵan bul ónerdiń tuǵyryn bekemdep júrgen qandastarymyzdyń basty kózdegeni - jastar arasynda búrkitshilikti nasıhattaý.
«Bul joıylyp bara jatyr. Bizdiń urpaqtarymyz atqa da minbeıdi, búrkit degennen qorqady, bilmeıdi. Sondyqtan ultymyzdyń osy dástúrin úıretýdi ózimizge maqsat tuttyq»,- deıdi qazylar alqasynyń múshesi Tabysbek Smaǵululy. Chempıonattyń bas júldesi men arnaıy syılyǵyn Nurǵazym Qalamanuly men Serik Baqytbekuly jeńip alyp, 150 myń teńge enshiledi. Osylaısha Qytaıdaǵy qusbegiler Qaraqııa qystaýyn sańqyldaǵan qyran daýysymen eki kún terbetip qaıtty.
