Qytaıda Búkilqytaılyq halyq ókilderi jınalysynyń tórtinshi sessııasy ashyldy
BEIJІŃ. 5 naýryz. QazAqparat /Rýslan Súleımenov/ - Búgin Beıjińde Halyqtar jınalysy úıinde Qytaıdyń joǵary bılik organy - Búkilqytaılyq halyq ókilderi jınalysynyń tórtinshi sessııasy ashyldy.
Sessııa jumysyn eldiń túkpir-túkpirinen jınalǵan 2923 delegat qatysýda.
Prezıdıýmda - QHR Tóraǵasy Hý Tszıntao, Halyq ókilderi Búkilqytaılyq jınalysyTuraqty komıtetiniń Tóraǵasy Ý Bango, QHR Memlekettik keńesiniń premeri Ven Tszıabao, t.b. otyr.
Depýtattar bir aptaǵa sozylatyn sessııanyń barysynda úkimettiń 2010 jylǵy jumysy týraly baıandamalardy tyńdaıdy jáne 2011 jylǵy ekonomıkalyq damý josparyn, 12 besjyldyqqa (2011-2015) arnalǵan jospardyń negizgi baptaryn bekitedi.
QHR Memlekettik keńesiniń premeri Ven Tszıabao óz baıandamasynda atap kórsetkendeı, 2006-2010 jyldary Qytaı ekonomıkasynyń damýynyń ortasha jyldyq ósý qarqyny 11,2 paıyzdy qurady.
«Jalpy ishki ónim 39,8 trıllıon ıýandy, al jyldyq ortasha ósý kórsetkishi -11,2 paıyzdy qurap, qarjy kiristeri 3,16 trıllıonnan 8,31 trıllıon ıýanǵa deıin ósti», - dep málim etti premer.
