Qytaıda bolǵan jol-kólik oqıǵasynda zardap shekken úsh qazaqstandyq aýrýhanadan shyqty

Bul týraly búgin Astanadaǵy aptalyq brıfıngte QR Syrtqy ister mınıstrliginiń baspasóz hatshysy Іlııas Omarov aıtty.

«Jol-kólik oqıǵasy kezinde zardap shekken qazaqstandyq tórt azamattyń úsheýi ótken aptada aýrýhanadan shyǵarylyp, bilim alyp jatqan jerlerine jiberildi. Taǵy bir azamat aýrýhanada. Oǵan áli em-dom qabyldaý qajet. Alaıda, úsh-tórt kúnniń ishinde onyń jaǵdaıynyń dárejesi anyqtalýy tıis. Sodan keıin baryp onyń emi qashan aıaqtalatynyn senimdi túrde aıta alatyn bolamyz», dedi І. Omarov.

І. Omarov qazirgi ýaqytta jol-kólik oqıǵasy kezinde zardap shekken Qazaqstan azamattaryna ótemeqy tóleý máselesi pysyqtalyp jatqanyn atap kórsetti. «Ótemaqynyń mólsheri jol-kólik oqıǵasy kezinde alǵan jaraqattyń dárejesine baılanysty anyqtalatyn bolady», dedi ol. Onyń aıtýynsha, Qazaqstan azamattaryna ótemaqy tóleý máselesi Qazaqstannyń Qytaıdaǵy Elshiliginiń konsýldyq bóliminiń jáne Úrimshidegi tólqujattyq-vızalyq qyzmettiń baqylaýynda.

Aıta keteıik, budan buryn baspasóz betterinde habarlanǵanyndaı, Qytaıdyń Úrimshi qalasynan shyǵyp, Sıan qalasyna bet alǵan avtobýs Hamı qalasyna jetpeı apatqa ushyraǵan. Avtobýsta barlyǵy 48 azamat bolǵan, onyń 15-i qazaqstandyqtar - Shensı provıntsııasyndaǵy Sıan qalasynyń ártúrli joǵary oqý oryndarynda oqıtyn stýdentter.