Qytaıda bolǵan jer silkinisinen qaza tapqandar sany 75 adamǵa jetti
BEIJІŃ. 22 shilde. QazAqparat - Qytaıdyń soltústik-batysyndaǵy Gansý provıntsııasynda dúısenbi kúni bolǵan jer silkinisi qurbandarynyń sany 75 adamǵa jetti, 584 adam túrli dárejede jaraqat alǵan, olardyń 70-i óte qıyn jaǵdaıda. Sonymen qatar, 14 adam habarsyz ketkender bolyp sanalady, dep habarlaıdy Sınhýa agenttigi jergilikti bılikke silteme jasap.
Magnıtýdasy 6,6 jer silkinisi dúısenbi kúni Beıjiń ýaqytymen tańerteń saǵat 07:45-te Gansý provıntsııasy Dınsı qalasynyń Mınsıan jáne Chjansıan ýezderiniń toǵysqan jerinde bolǵan. Jer asty dúmpýiniń oshaǵy soltústik endikte 34,5 gradýs jáne shyǵys boılyqta 104,2 gradýs koordınattarymen 20 shaqyrym tereńdikte tirkelgen.
Jergilikti BAQ habarlary boıynsha, zardap shekken aýdandarda baılanys jáne elektrmen jabdyqtaý úzilgen, ýaqyt ótken saıyn sel tasqynynyń kesirinen izdestirý-qutqarý jumystaryn júrgizý qıyndap otyr. Qazirgi ýaqytta jer silkinisinen zardap shekkender týraly málimetter anyqtalýda.
QHR tóraǵasy Sı Tszınpın adam ómirin qutqarý úshin barynsha kúsh salýǵa shaqyrdy.
Dúleı apat saldaryn joıýǵa armııa, polıtsııa bólimsheleri, sondaı-aq eriktiler jumyldyryldy. QHR bıligi búgin Gansý provıntsııasynda bolǵan jer silkinisine baılanysty 4-deńgeıli TJ jedel áreket etý tártibi engiziletinin jarııalady.
