Qytaıda Boaos azııalyq forýmy ashyldy
Bıylǵy shara «Transformatsııadaǵy álem: «Bir beldeý – bir jol» bastamasy boıynsha jahandyq basqarý jáne yntymaqtastyq úshin kúsh-jigerimizdi biriktiremiz» degen uranmen ótýde.
«Bizdiń boljamymyz boıynsha, 2021 jyly Azııanyń JІÓ - niń ósý qarqyny jedeldep, 6,5%-dan asady», - dedi jeksenbide jıyndy ashqan baspasóz máslıhatynda Boao azııalyq forýmynyń bas hatshysy Lı Baodýn.
Onyń aıtýynsha, «Bir beldeý – bir jol» bastamasy, ASEAN elderiniń 2025 jylǵa deıingi damý baǵdarlamalaryn, Eýrazııalyq ekonomıkalyq odaq pen basqa da óńirlik jáne jahandyq bastamalar óńirlik ekonomıka men saýda-ekonomıkalyq yntymaqtastyqty pandemııadan keıin qalpyna keltirý úshin ushtastyrýǵa yqpal etedi.
Dóńgelek ústelder men pikirtalastar «Qytaıdy túsiný», «Jahandyq ózgeristerge ilesý», «Beldeý men joldyń ózara is-qımyly», «Indýstrııalyq qaıta qurý jaǵdaılarynda», «Barshaǵa arnalǵan jańa tehnologııalar» jáne «Ózara tıimdi damý» atty alty negizgi taqyrypqa arnalǵan. Jıynnyń negizgi bóligi dástúrli formatta ótedi. Pandemııaǵa baılanysty kóptegen spıker «onlaın» formatta sóz sóıleıdi.
BAF uıymdastyrýshylary jıynnyń dástúrli formatyna 60-tan astam elden 2,6 myńnan astam delegat qatysatynyn habarlady.
18-21 sáýir aralyǵynda ótetin bul sharaǵa álemniń ár túkpirinen kelgen saıasatkerler men úkimet músheleri, halyqaralyq uıymdardyń basshylary, bedeldi ǵalymdar men saıasattanýshylar, sondaı-aq iri halyqaralyq korporatsııalardyń ókilderi qatysady.
Qazirgi BAF otyrysyna qatysýshylar arasynda Halyqaralyq valıýta qorynyń basqarýshy dırektory Krıstalına Georgıeva, Dúnıejúzilik saýda uıymynyń bas dırektory Ngozı Okondjo-Iveala, Ekonomıkalyq yntymaqtastyq jáne damý uıymynyń bas hatshysy Anhel Gýrrıa jáne basqalary bar.
Delegattar tizimine sáıkes BAF jumysyna Apple bas dırektory Tım Kýk pen Tesla kompanııasynyń bas dırektory Ilon Mask, Intel bas dırektory Patrık Gelsınger jáne basqalary qosylady.
Qazaqstan bıyl forýmǵa onlaın rejıminde qatysady. BAF-ta QR Strategııalyq josparlaý jáne reformalar jónindegi agenttiginiń tóraǵasy - «Astana» halyqaralyq qarjy ortalyǵynyń basqarýshysy Qaırat Kelimbetov sóz sóıleıdi dep kútilýde.
Eske sala keteıik, 2020 jyly koronavırýs pandemııasyna baılanysty jyl saıynǵy BAF jınalysy toqtatylǵan bolatyn. BAF tarıhynda jyl saıynǵy shara tek 2003 jyly, QHR-da atıpııalyq pnevmonııa tirkelgen kezde ǵana toqtatylǵan edi. Ol kezde jınalys qarashaǵa aýystyryldy.
2001 jyly qurylǵan Boao azııalyq forýmy – Qazaqstandy qosa alǵanda, 29 múshe memleket bastamashylyq etken úkimettik emes halyqaralyq uıym. BAF maqsaty-Azııadaǵy óńirlik ekonomıkalyq ıntegratsııany qoldaý.
