Qytaıda bir kúnde úsh qandasymyz jeńis tuǵyrynan kórindi

ASTANA. QazAqparat – 6 qarasha kúni úsh birdeı qytaılyq qazaqtar sport túrlerinen saıystar boıynsha joǵary júldege ıe bolyp, jeńis tuǵyrynan kórindi, dep habarlaıdy QazAqparat.

Qytaılyq BAQ-tyń jazýynsha, 2022 jyly 6 qarasha kúni Beıjińdegi marafonda 42 shaqyrymdyq erler jarysynda Eleýbek Qýanuly (Іle aımaǵy Qulja aýdanynan) 2 saǵat 14 mınýt 34 sekýndtyq nátıjemen bas júldeni jeńip aldy. Sonymen qatar dál osy kúni Qytaıdaǵy Gúıjýdyń Tońryn qalasynda ótkizilgen 21 shaqyrymdyq marafon jarysynda taǵy bir etnıkalyq qazaq Tuıǵyn Serikuly (Іleniń Nylqy aýdanynan) bas júldeni ıelengen. Taǵy bir Saıran Nurdanbek esimdi qandasymyz (Іleniń Kúnes aýdanynan) AQSh-tyń Las-Vegas qalasynda 6 qarasha kúni ótken UFC (aralas jekpe-jek) týrnırinde úshinshi jeńisine qol jetkizgen edi.

Aıta keteıik, Qytaılyq 26 jastaǵy qazaq Saıran Nurdanbek (39-10) 6 qarashada Las-Vegasta ótken UFC Fight Night 214 týrnırinde jekpe-jekke shyqty. Qazaq faıterdiń qarsylasy amerıkalyq Derrık Mınner (26-14) boldy. Jartylaı jeńil salmaqtaǵy aıqas úsh raýndqa eseptelgen, alaıda, Saıran Nurdanbek qarsylasyn bir mınýtta-aq qulatty.