Qytaıda beıádep kontenti bar 6 myńnan astam saıt jabyldy

ASTANA. QazAqparat - 2017 jyly Qytaı úkimeti erotıkalyq jáne beıádep kontenti bar 6 myńnan astam ınternet saıty men WeChat messendjerindegi akkaýntardy japty, dep habarlaıdy Sınhýa agenttigi.

Pornografııaǵa, zańsyz baspa, aýdıo jáne vıdeoónimderge qarsy kúres jónindegi Búkilqytaılyq keńseniń baıandamasynda taza mádenı ortany qalyptastyrý naýqany aıtýly jetistikterge jetkeni aıtylady.

2017 jyly ǵalamtordan 4,5 mıllıonnan astam erotıkalyq sıpattaǵy jazba óshirilgen, al onlaın servıs provaıderleri 20 mıllıonǵa jýyq osyndaı jazbany ózdiginen óshirgen. Bılik WeChat arqyly erotıkalyq vıdeo taratý jóninde kóptegen iri qylmystyq isterdi ashyp, 20 óńirden 100 myńnan astam adam jaýapqa tartyldy. Onyń ishinde kámelet jasyna tolmaǵandar da bar.

Budan tys, QHR úkimeti pornografııalyq kontentti taratýdyń jańa tásilderin de anyqtady. Pornografııalyq vıdeolardy júkteý úshin silteme jibergen 30-dan astam kúdikti ustaldy. Jurtshylyq ta osy sharaǵa belsendi qatysty.