Qytaıda bala saýdagerleriniń iri arnasy joıyldy
ASTANA. 28 shilde. QazAqparat - Qytaı quqyq qorǵaý organdary bala saýdagerleriniń iri arnasyn joıdy.
Eldiń birneshe aımaqtary boıynsha uıymdastyrylǵan keń aýqymdy sharalar barysynda shashamen 400 adam tutqyndaldy, olardyń kóbi - vetnamdyqtar, dep habarlaıdy Euronews.
Nátıjesinde 89 bala tutqynnan bosatyldy, olardyń eń kenjesine 10 kún de tolmaǵan, al eń úlkeni - 4 jasta. Balalardyń birazy urlanǵan, alaıda olardyń arasynda ata-anasy satyp jibergen balalar da bar.
«Qylmyskerler bıznesin asa kásibı negizde qalyptastyrǵan. Máselen, shekaralyq ózenderdi keship óterde qolynda bala bar ekenin habarlaý úshin olar uıaly telefon emes, shamdar men alaýlar paıdalanǵan. Kóp jaǵdaıda bul arnanyń vetnamdyq músheleri óz jumysyn Qytaı shekarasyna kirmeı-aq jalǵastyra bilgen», - deıdi QHR Qylmystyq zertteýler bıýrosynyń tóraǵasy.
Qatań jazalaýǵa qaramastan, Qytaıda adam saýdasy tyıylar emes. Sarapshylardyń pikiri boıynsha, oǵan «bir otbasy - bir bala» saıasaty sebep bolyp otyr. Dástúrlik qundylyqtardy ustanýǵa beıim otbasynda mindetti túrde ul bala bolýy kerek jáne onyń qyz bolýy múmkin degen qaýippen ózderi týǵannan kóri, satyp alý álde qaıda jeńilirek. Al otbasynda birneshe balasy bar ata-ana qursaǵynan shyqqan urpaǵyn satyp jiberýge árkez daıyn.
