Qytaıda bala sany kúrt kóbeıdi
ASTANA. QazAqparat - Qytaıda bıyl bala sany kúrt kóbeıdi. Óıtkeni resmı bılik ult qartaıyp bara jatqan soń, ár otbasy úshin bir bala saıasatyn jumsartqan bolatyn. Bıyl, sonymen qatar, Qytaıda bosanǵan analar men nárestege qajetti taýarlardyń saýdasy artyp, sábılerge kerekti dúnıelerdi ınternetten satyp alý 35%-ǵa ósken, dep habarlady www.24.kz.
Arna tilshisiniń aıtýynsha, Qytaıdaǵy bala týý sanynyń kúrt ósýiniń eki sebebi bar. Birinshisi, árıne, bir bala saıasatynyń jumsartylýy, ekinshisi - jylqy jyly qytaılyqtar úshin qasıetti sanalady. Sondyqtan yrymshyl halyq jáısiz bolatyn qoı jylynda emes, balaly bolýdy bıyl jappaı josparlaǵan. Qytaıdyń 31 provıntsııasynyń 29-ynda bir bala saıasatyn ózgertip, eger erli-zaıyptylardyń biri otbasynda jalǵyz ósse, ekinshi bala súıýine ruqsat etti. Osylaısha 70-jyldardyń sońynda demografııany retteý úshin engizilgen saıasat jumsartyldy.
- Eki balaly bolý biz sekildi jas otbasylarǵa jaqsy boldy. Jalǵyz bala ózimshil bolyp ósedi, sondyqtan biz ekinshisin osy jylǵa josparladyq, - deıdi Beıjiń qalasynyń turǵyny Saı Jııaý.
Gýandýn provıntsııasynda da júkti áıelderdi kóp kezdestirýge bolady. Bıyl naýryz aıynan bastap jańa demografııalyq ereje jarııa bolǵan eldi mekendegi perzenthanada bos oryn qalmaǵan. Sondyqtan qosymsha taǵy 40 tósek qoıdyrdy. Budan bólek, ekinshi balasyna júkti kelinshekter bosanatyn ýaqyty kelmese de, oryndardy aldyn ala daıyndap qoıǵan.
Bir bala saıasaty Qytaıda qarttar sanynyń kóbeıýine ákeldi. Budan bólek, ár otbasy urpaq jalǵastyratyn ul balany qalap, boıyna qyz bala bitse, aldyrtyp tastaıtyn. Sonyń kesirinen 10 jyldan keıin elde 30 mln. súr boıdaqqa qalyńdyq jetispeýi múmkin. Bul máselege qazirdiń ózinde qytaılyq ata-analar alańdaýly. Olar aptasyna úsh ret Beıjińdegi ortalyq saıabaqta qalyńdyq pen kúıeý balalar jármeńkesin ótkizip turady. Aqparat paraqshasynda úmitkerdiń salmaǵy, boıy, tipti aılyq tabysy da kórsetilgen. Quda-qudaǵı bolýdan úmittiler telefon almasyp, keıin jastardy úgitteıdi.
Búginde 30 jastyń aınalasyndaǵy súrboıdaqtardyń basym bóligi otbasynda jalǵyz ósken erkeler eken. Olardyń úılengisi kelmeı júrip alýy da sol bolsa kerek. 2050 jylǵa qaraı mundaǵy halyqtyń ¼-i zeınetker bolady degen boljam bar.
