Qytaıda BAQ-tyń 25 ókili tutqyndaldy
BEIJІŃ. QazAqparat - Qytaıda kompanııalardan aqsha bopsalaǵan buqaralyq aqparat quraldarynyń jetekshilerin qamaýǵa alý jalǵasyp jatyr.
«Sınhýa» agenttiginiń habarlaýynsha, Shanhaı prokýratýrasynyń qyzmetkerleri 21cbh.com jańalyqtar saıtynyń prezıdenti Lıý Dýndy, atalǵan resýrstyń bas redaktorynyń orynbasary Chjoý Bındi, sonymen birge, Hýnan provıntsııasyndaǵy tilshiler pýnktiniń basshysy Sıa Sıaobony qamaýǵa aldy. Sonymen birge, «Money Week» baspageri Sıa Jı men onyń bas redaktory Lo Gýanhýeıdi tutqyndady. Osy is boıynsha qamaýǵa alynǵan BAQ ókilderiniń sany 25 adamǵa jetti. Eske sala keteıik, qyrkúıek aıynda Shanhaıda «21st Century Business Herald»gazetiniń baspageri Shen Hao men bas dırektory Chen Dýnıan qamaýǵa alynǵan bolatyn. Aıyptalýshylar 200-den astam kompanııaǵa olar jaıly jaǵymsyz materıaldar jarııalaıtynyn aıtyp, aqsha bopsalaǵan. Osy oqıǵadan keıin baryp basylymynyń redaktorlary men tilshileri qamaýǵa alyndy. «21cbh.com»-nyń ortalyq keńsesi Gýandýn provıntsııasynda ornalasqan. Medıa-resýrs qarjylaı jáne iskerlik medıa-ındýstrııa salasynda iri kásibı» aqparat quraly retinde sanalady jáne ol «21st Century Media Co. Ltd.» holdınginiń quramyna enedi.
