Qytaıda avtopılot rejıminde júretin kólikter zańdastyryldy

BEIJІŃ. QazAqparat – Qytaıdyń Shenchjen qalasynyń bıligi alǵash ret megapolıste júrgizýshiniń basqarýynsyz júretin «aqyldy kólikterdi» paıdalaný erejelerin jarııalady. Ol 1 tamyzdan bastap kúshine endi. Bul týraly qalalyq zań shyǵarýshy organ qabyldaǵan qaýlyda aıtylǵan, dep habarlaıdy QazAqparat tilshisi.

Erejege sáıkes, kólikti avtonomdy basqarýdyń úsh deńgeıi engiziledi.

Birinshisi - shartty avtomatty júrgizý. Onda kólik júrgizýshiniń jarty mindeti avtomatty túrde basqarylady.

Ekinshisi – temirtulpar avtopılot rejıminde júrgizýshiniń búkil fýnktsııasyn atqarady.

Úshinshisi - tolyq avtomattandyrylǵan protsess.

Erejeniń alǵashqy eki deńgeıinde kólik quralyn basqarýǵa júrgizýshi qatysýy tıis. Al, úshinshi deńgeıde «aqyldy temirtulpar» júrgizýshiniń qatysýynsyz mejeli jerge ózi aparady.

Sonymen qatar, mundaı sanattaǵy kólikterdiń qatysýymen bolatyn jol-kólik oqıǵalaryna qatysty arnaıy jaýapkershilik engiziledi.

Máslen, avtonomdy basqarylatyn kólikte júrgizýshi otyrǵan kezde apat bolsa, onda júrgizýshi kináli bolady. Mundaı jaǵdaıda ol zardap shekken tarapqa ótemaqy tóleýge mindetteledi.

Eger kólikte júrgizýshi joq kezde jol-kólik oqıǵasy oryn alsa, onda kóliktiń ıesi jaýapkershilikke tartylady.

Al «aqyldy temirtulpardyń» aqaýyna baılanysty apat bolsa, onda onyń ıesi kólikti qurastyrǵan kompanııadan ótemaqy talap etýge quqyly.

Júrgizýshiniń tikeleı basqarýyn talap etpeıtin kólikter qalanyń belgilengen aımaqtaryndaǵy arnaıy joldarda ǵana júre alady.