Qytaıda ártister mingen avtobýs jartastan qulap, 20 adam ajal qushty
ASTANA. QazAqparat - Qytaıdyń Henan provıntsııasynda jergilikti opera trýppasy jalǵa alǵan avtobýs jartastan qulap, 20 adam qaza tapty, túrli jaraqattar alǵan taǵy 13 adam aýrýhanalarǵa jetkizildi, dep habarlaıdy Sınhýa agenttigi.
Polıtsııa kólik apatynyń mán-jaılaryn anyqtaý ústinde.
Ókinishke qaraı, Qytaıda osyndaı apattar jıi bolyp turady. Aldyńǵy jyly Henan provıntsııasynda ishinde 47 jolaýshy otyrǵan avtobýs shatqalǵa aýdaryldy. Onda alty adam mert bolyp, taǵy 38 adam jaraqattanǵan.
Al ótken jyly Shanhaı-Kýnmın kúre jolynda avtobýs órtengish suıyqtyq quıylǵan fýrgonmen soqtyǵysyp, jaryldy. Bul qaıǵyly oqıǵa saldarynan 40-qa jýyq adam ajal qushty.
Aıta keteıik, bıyl Chjetszıan provıntsııasynda egde jastaǵy qytaılyq azamat aıaldamada toqtamaı ótken avtobýs júrgizýshisine granata laqtyrǵan. Abyroı bolǵanda, jarylys saldarynan eshkim zardap shekken joq.
