Qytaıda Ardagerler isteri jónindegi jańa mınıstrlik qurylady
BEIJІŃ. QazAqparat - Búgin 13-shaqyrylǵan Jalpyqytaı halyq ókilderi quryltaıynyń tarıhı 1-sessııasynda delegattardyń qaraýyna usynylǵan QHR Memlekettik keńesi reformasynyń jobasy belgili boldy, dep habarlaıdy «QazAqparat» HAA-nyń Qytaıdaǵy menshikti tilshisi.
QHR Memlekettik keńesiniń Premeri Lı Ketsıan qol qoıǵan №53 qujatta Qytaı úkimetiniń qurylymyna ózgerister engizý qarastyrylǵan. Atap aıtqanda, Ardagerler isteri jónindegi (otstavkadaǵy áskerıler) jańa mınıstrlik, Kóshi-qon jónindegi memlekettik basqarma, Halyqaralyq yntymaqtastyqty damytý keńsesi, Medıtsınalyq saqtandyrý memlekettik bıýrosy qurylmaq.
Sondaı-aq Jer jáne tabıǵı resýrstar mınıstrligi, Memlekettik okeanologııalyq basqarma, Geodezııa jáne kartografııa memlekettik bıýrosy Tabıǵı resýrstar mınıstrligine biriktiriletin bolady.
Qorshaǵan ortany qorǵaý mınıstrligi Ekologııalyq orta mınıstrligi bolyp, al Aýyl sharýashylyǵy mınıstrligi - Aýyl sharýashylyǵy jáne aýyl isteri mınıstrligi, Densaýlyq saqtaý jáne josparly bala týý isteri memlekettik komıteti - Gıgıena jáne densaýlyq saqtaý memlekettik komıteti bolyp ózgertiledi.
Budan bólek, Mádenıet jáne týrızm mınıstrligi, Banktik saqtandyrýlardy basqarý jáne qadaǵalaý komıssııasy, Apattyq basqarý mınıstrligi, Azyq-túlik jáne materıaldyq rezervter memlekettik basqarmasy, Naryqty baqylaý memlekettik basqarmasy, Ǵylym jáne tehnologııalar mınıstrligi, Ádilet mınıstrligi, Intellektýaldyq menshik quqyǵyn qorǵaý memlekettik basqarmasy, Qadaǵalaý ulttyq komıssııasy, Radıo jáne telehabar taratý boıynsha bas memlekettik basqarmasy qurylady.
