Qytaıda «Altyn adam» kórsetildi
«Altyn adamnyń álem mýzeılerine sherýi» halyqaralyq jobasy aıasyndaǵy «Eýrazııa saharasyndaǵy alǵashqy kóshpeli ulttyń mádenıeti» atty kórme Shııan qalasy turǵyndarynyń kózaıymyna aınaldy. Kórmeni «Tań patshalyǵy» memlekettik murajaıy men Qazaqstan Respýblıkasy Ulttyq mýzeıi birlesip uıymdastyrǵan.
Oǵan Qazaqstanyń nyshany retinde búkil álemge tanymal bolǵan «Altyn adam» eksponaty qoıyldy. Sonymen qatar, Qazaqstan Respýblıkasy Ulttyq mýzeıi qorlarynan HІH - HH ǵasyrlardyń ortasyna deıingi ýaqytqa jatatyn kúmisten jasalǵan áıelder áshekeıleri, bizdiń zamanymyzǵa deıingi VII-ІІІ ǵasyrlarǵa tıesili altyn buıymdar usynyldy. Kórmege qoıylǵan jádigerlerdiń jalpy sany 81-den asady. Shara 15 maýsymǵa deıin jalǵaspaq.
«Qazaqstannyń nyshanyna aınalǵan asyl mura - «Altyn adam» dúnıede sırek kezdesetin jaýhar. Tek qazaqstandyqtar tamashalap kelgen erekshe jádigerdi shııandyqtar kórýge múmkindik aldy. «Altyn adamdy» kórgilerińiz kelse «Tań patshalyǵy» memlekettik murajaıyna kelińiz. Bunda qoıylǵan jaýharlar saq, úısin, qańly mádenıetterinen syr shertedi», - dep jazady derekkóz.
Eske sala keteıik buǵan deıin «Altyn adamnyń álem mýzeılerine sherýi» jobasy aıasynda atalmysh jádiger Máskeý kórmesine qoıylǵan bolatyn.
