Qytaıda alǵashqy «zańdy ekinshi balalar» dúnıege keldi
ASTANA. QazAqparat - 2016 jyldyń 1 qańtarynan Qytaıda otbasy týraly jańa zań kúshine endi. Onda ekinshi balanyń týýyna qoıylǵan shekteýler alyndy, dep jazdy gbtimes.com portaly.
Qytaılyq BAQ habarlaǵandaı, 2016 jyly 1 qańtarda saǵat 0:00 keıin týǵandar ǵana zańdy quqyqqa ıe bolǵan.
Osyǵan baılanysty júkti áıelder sábıin 1 qańtarda dúnıege ákelýge tyrysqan.
Osylaısha, Fýtszıan provıntsııasy Tszıanchjoý qalasynyń turǵyny qyzyn 2016 jyldyń 1 qańtarynda saǵat 2:46 dúnıege ákelgen. Jergilikti BAQ-qa bergen suhbatynda tegi ıAn áıel qyzdy 2016 jyly dúnıege ákelý úshin qolynan kelgenin jasaǵanyn aıtty. Kózdegenine jetip, qyz zańdy ekinshi balasy atandy.
Al Tszıanchjoý qalasynyń taǵy bir Ý degen turǵyny 2016 jyldyń 1 qańtarynda bosanýy tıis edi. Alaıda ul jańa jylǵa birneshe mınýt qalǵanda dúnıege kelgen, ıaǵnı ol 2015 jyly týdy. 2015 jylda kúshine ıe zań boıynsha erli-zaıyptylarda ekinshi balany dúnıege ákelý quqyǵy bolmaǵandyqtan, olar 100 myń ıýan (15 360 AQSh dollary) kóleminde aıyppul tóleýge májbúr boldy.
Al Chen januıasynda ekinshi sábı 27 jeltoqsanda dúnıege kelýi tıis edi. Erli-zaıyptylar 80 myń ıýan (12 288 AQSh dollary) kóleminde aıyppul tóleýge daıyn bolǵan. Alaıda uldary 1 qańtarda saǵat 10:18 dúnıe esigin ashyp, zańdy bala atandy. Ákesi ulyn Bavan dep ataıtynyn aıtty. Ol qytaı tilinen aýdarǵanda «80 myń ıýan» degendi bildiredi eken.
2002 jyldan kúshke ıe bolǵan zańǵa sáıkes, ekinshi balany týýǵa tyıym salynǵan zańdy buzǵany úshin aıyppul salǵanda, otbasynyń tabysyna qaraǵan.
QHR-da týýdy shekteý saıasaty 1970 jyldardyń ortasynan bastalǵan. Eńbek resýrstary tapshylyǵynyń ósýi jáne turǵyndardyń tez qartaıýy máselesine tap bolǵan Qytaı 2013 jyly erli-zaıyptylardyń biri jalǵyz bala bolǵan jaǵdaıda bul jupqa ekinshi balany dúnıege ákelýge ruqsat berdi.
Ekinshi balany dúnıege ákelý tyıymyn alyp tastaý sheshimi 2015 jyldyń sońynda qabyldandy.
