Qytaıda alǵash ret murynǵa shashatyn spreı túrindegi tumaýǵa qarsy vaktsına jasaldy

BEIJІŃ. QazAqparat - Qytaıdyń Shandýn provıntsııasynda jergilikti turǵyndarǵa alǵash ret murynǵa shashatyn spreı túrindegi tumaýǵa qarsy vaktsına qoldanyla bastady, dep habarlaıdy QazAqparat Sınhýa agenttigine silteme jasap.

Tumaýǵa qarsy vaktsınanyń bul jańa túri 3 jastan 17 jasqa deıingi balalarǵa jasalady. Murynǵa shashylatyn mundaı vaktsınatsııa jylyna bir ret júrgiziledi. Murynǵa 0,1 ml spreı shashylady, 3 kúnnen keıin adam aǵzasynda antıdeneler paıda bolady.

Qytaılyq buqaralyq aqparat quraldarynyń habarlaýynsha, bul ónim Dúnıejúzilik densaýlyq saqtaý uıymynyń (DDSU) tumaýǵa qarsy vaktsınalarynyń ǵalamdyq josparyna (GAP) engizilgen. 2011 jyly DDSU-nyń maquldaýymen tumaýǵa qarsy murynǵa shashylatyn spreı tehnologııasy Qytaıǵa berilgen bolatyn.

Qazir Qytaıda tumaýǵa qarsy vaktsınatsııa keń kólemde júrgizilip jatyr jáne búkilhalyqtyq vaktsınatsııa qazan aıynyń sońyna deıin aıaqtalady dep josparlanǵan.