Qytaıda álemdegi eń iri radıoteleskop salynyp bitti
ASTANA. QazAqparat - Qytaıdyń ońtústik-batysyndaǵy Gýıchjoý provıntsııasynda álemdegi eń iri radıoteleskoptyń qurylysy aıaqtaldy, dep habarlady TASS.
Mamandar FAST (Five hundred meter Aperture Spherical Telescope) radıoteleskopy quramyndaǵy 4450 shaǵyldyrǵyshtyń sońǵysyn ornatty.
FAST reflektorynyń dıametri 500 metrdi quraıdy, buǵan deıin eń iri sanalǵan Aresıbo (Pýerto-Rıko) observatorııasyndaǵy teleskoptyń dıametri 305 metr edi.
Teleskopty jasaý kezinde kóptegen qıyndyqtar týyndady. Qurylys alańynan 5 shaqyrym jerde ornalasqan Pıntan jáne Lodıan taýly ýezderinde turatyn toǵyz myńnan astam adamdy kóshirýge týra kelgen.
Astronomdar teleskoptyń kómegimen 11 mlrd jaryq jyly qashyqtyǵynda ornalasqan ǵarysh nysandaryn baqylamaq.
QHR-dyń Ulttyq ǵarysh agenttiginiń habarlaýynsha, radıoteleskop kómegimen jerden tys órkenıetterdi de anyqtaýǵa bolady. 2016 jyldyń derekteri boıynsha Jerden eń alys nysan GN-z11 galaktıkasy bolyp tabylady. Ol 13,4 mlrd jaryq jyl qashyqtyqta ornalasqan. Bul galaktıka «Habbl» orbıtaldi teleskop kómegimen anyqtalǵan.
